大量藝人現身「流水式」集會 – 香港人加油

788

民陣原於今日(18日)在維園以「流水式」舉行集會,市民冒大雨在銅鑼灣、天后一帶be water,集會人群當中見到一向支持社運的明哥黃耀明、早前曾到旺角「行街」的Tommy阮民安,記者亦見到穿上黑衣的王喜,當然不少得走在最前的何韻詩。

明哥受訪時表示,政府以為「派糖」可以息眾怒,但他認為:「香港人係唔可以被賄賂嘅。」政府未回應五大訴求,香港人會一直上街。講到近日有好多傳言指解放軍會殺入香港,深圳更有武警駐守,明哥指:「咁就證明林鄭嘅管治係冇效,如果佢管治冇效點解唔快啲辭職?呢啲傳言係用嚟恐嚇市民,係一啲好低莊、絕對唔高明嘅手段,假如係真嘅,中國係破壞咗一國兩制,係佢一手摧毀呢樣嘢。」

何韻詩約在下午2時到達維園,她穿着一件黑色、寫上「香港x」的T恤,問到今天政府不批准遊行,會否覺得政府在剝削大家的權利,她說:「絕對係一個剝削嚟,其實呢樣剝削由6月開始已經不斷咁發生,呢個政府不斷喺度行差踏錯,每一步都喺度漠視人民,壓榨人民嘅聲音,如果唔係,大家今日唔會嚟到呢一步,發生咁嘅場面,絕對係政府嘅責任,呢個係佢哋唔可以推卸、唔可以推畀其他人,或者推畀差人或巿民。不過差人喺呢方面當然都有好大嘅責任,喺政府面前,佢哋用佢哋嘅極權去打壓人民,利用催淚彈或橡膠子彈等等去傷害香港嘅巿民,歷史係會記住呢件事,會知道係佢哋嘅責任囉!」

講到連日來有很多人受傷,又發生很多事,問阿詩會否覺得在五大訴求上,會有更多想追討的事?阿詩表示:「香港政府同警察係必須受到制裁,佢哋用唔正常、唔守規矩嘅方法打壓我哋嘅聲音,當中已經有700至800人被捕,佢哋用咗2,000幾個催淚彈,呢個係唔對等嘅暴力或者係手法。其實極大部份嘅時間巿民都係和平去展示佢哋嘅訴求,但佢哋好似放題式咁用催淚彈,同埋啲差人冇再展示佢哋嘅編號,好似互相喺度包庇,加上林鄭每次出嚟講嘢,就算係最近嗰一次,佢個樣都係顯得不可一世,嘴藐藐,嗰種高高在上嘅態度已經返嚟啦,呢一樣嘢係冇可能要求到巿民去冷靜,係唔會發生嘅。」

講到近日有拍到軍隊及車的短片流出,會否覺得是白色恐怖?阿詩說:「絕對係!呢個係共產黨慣常用嘅方法,令到巿民滅聲,散播恐慌,上個禮拜大家就唔多唔少會有啲恐慌嘅,但係呢啲發生喺成年人或比較年長嘅人身上,發揮到作用啦,因為佢哋經歷過8964嘅包袱之下,驚會再發生,但係我嘅睇法係,大家唔好再孭住呢啲包袱喇。」

阿詩續建議:「大家喺抗爭路上,應該要有清晰嘅思考,唔好因為呢啲白色恐懼就蓋過自己嘅判斷,香港喺國際巿場上仍然有佢嘅地位,對於中國大陸嚟講,香港仲有好重要嘅角色,因為有無數嘅公司透過會香港去進出啲金錢或軍火,唔能夠塑造到香港唔重要,我覺得呢個可能性係不大嘅。加上佢哋譬如有美國嘅貿易戰,台灣就嚟大選,中國大陸面對內憂外患,唔會付上咁大嘅代價囉!我覺得係未必嘅。只要我哋去堅持我哋,其實而家已經見到啲未見到嘅成績,同埋改變已經進行中,香港巿民應該拋開過往嘅恐懼包袱,用我哋嘅智慧、團結,可見嘅未來就會有出路。」

Source:appledailys